Сагаалганай түрүүшын үдэр эхэ байгаалимнайшье һайндэртэ даган баясаһан мэтэ, газаа һалхигүй дулаахан, наран игаажа, хүсэд хурсахан болоһон элшэнүүдээ сасаргажа байһандал үзэгдөө. Зарим зон болзорто сагһаа урид ерэжэ, аажамханаар угайнгаа сэргэдэ хадагуудаа үргэнэ, наманшалан мүргэнэд.
   Тиигэһээр Агын Буряадай тойрогой, муниципальнай тойрогуудай, Ага тосхоной захиргаануудай толгойлогшонор, бэшэшье дарганар, лама санаартан, ажаһуугшад – сугларха зон сугларжа, хэмжээ ябуулга эхиеэ абаа. Түрүүн Агын дасанай шэрээтэ Цыбиков Бадма ламхай бүгэдэндэ хандажа: «Морилжо ерэһэн гал улаан морин жэлээр Агын Буряадай тойрогой дасануудай шэрээтэнэрэй, ламанарай зүгһөө бултыетнай амаршалнаб.
   Бидэ, Агын буряадууд, малша арад гээшэбди. Тиимэһээ сэгээ зөөхэймнай, һү тарагнай элбэг, малнай арьбантай байг лэ. Мүнөө гаража ерэһэн морин жэлдэ оролдоһон лэ хүнэй ажал хэрэгүүдынь бүтэсэтэй, шармайһан хүн үрэ дүнтэй байха. Тиимэһээ энэ жэлдэ булта һайнаар, оролдосотойгоор ажал хэе. Мүн байгша ондо Агадамнай буддын шажанай талаар ехэ найрнууд болохонь: Агын дасан 215 жэлээ, Сүүгэлэймнай дасан – 225, Зугаалайн дасан 200 жэлээ угтахаяа байна. Иимэ һайхан, ойн баярнуудаар дэмбэрэлтэй жэлдэ олоороо хабаадалсажа, дасануудай далгада хүртэлсыт гэжэ уряалнаб.
   Үнгэрэгшэ жэлэй дүнгүүдээр хэлэхэдэ, хатуушаг саг гээшэ ааб даа, тиигээшье һаа 2025 он дан муу жэл байгаа гэжэ хэлэхээр бэшэ: таряатай, үбһэ ногоотой, саһатай – иимэ жэл тогтоһон байна. Морин жэлнай баһал үбһэ ногоотой, шииг нойтотой һайн жэл болог», - гэжэ үреэгээ.
   Үбэр Байгалай хизаарай Засагай газарай түрүүлэгшын орлогшын – Агын Буряадай тойрогой Захиргаанай хүтэлбэрилэгшын уялга дүүргэгшэ Ананда Дондоков тойрогой Захиргаанай зүгһөө арад зоноо буужа ерэһэн Сагаан һараар, Сагаалганаар амаршалаад, хүсэл һаналаа мэдүүлэн, үреэлэй һайхан үгэнүүдые хэлэхэдээ, баруун тээ боложо байһан дайн дажарай үнгэрхые, Эсэгэ ороноо хамгаалжа ябаһан хүбүүдэймнай амиды мэндэ бусахые хүсөө. «Бүгэдэндэ һайн һайханиие хүсэнэб. Һанаһан хэрэгтнай бүтэсэтэй, аха захатанаа хүндэлжэ, залуушуулдаа һургаал заажа, бултадаа бурхантай буянтай ябаял даа», - гэжэ хэлэбэ.
   Агын Буряадай тойрогой Түлөөлэгшэдэй суглаанай түрүүлэгшэ Жаргал Жапов Үбэр Байгалай хизаарай Хуули тогтоолгын, тойрогой Түлөөлэгшэдэй суглаануудай зүгһөө буряад арадайнгаа буурал һайндэрөөр, зүүн зүгэй литээр буужа ерэһэн гал улаан морин жэлээр хани халуунаар амаршалаа. Бүгэдэ зондо амжалтатай, урагшатай, үрэжэлтэй жэл болохыень, адуу мал үдэсэтэй, тала нугын таряа ногоогоор баян, үбгэд хүгшэдэй буянтай, үхи хүүгэдэй эрдэмтэй, бүгэдэ энхэ элүүр, ута наһатай, буян хэшэгтэй байхыень, мүн баруун тээ боложо байһан дайн дажар дүүрэжэ, нютагаймнай хүбүүдэй аба эжыдээ, гэр бүлэдөө бусажа, саашадаа нютагайнгаа, тойрогойнгоо, хизаар болон гүрэнэйнгөө хүгжэлтэдэ хабаадалсажа ябахыень хүсэһэн байна. Агын муниципальна тойрогой захиргаанай толгойлогшо Насак Бабужапов хүхэ номин тэнгэри доро энхэ элүүр, һайн ябахые үреэн хэлэбэ.
   Амаршалгын үгэнүүдэй һүүлээр ламанар мүндэлһэн гал улаан морин жэлдэ арад зоной амгалан тэнюун ажаһуухын түлөө «Хии мориной арюудхаха сан» уншалга бүтээгээ, сугларагшад сэржэм, сагаан эдеэн табаг үргөөд, «Юндэн Шодон» субарга гороолоод, бүгэдэ дүхэриглэн, ёохор хатараад тараа.
   Бидэшье, «Толон» һониной сурбалжалагшад, тэндэ хабаадалсажа, угайнгаа сэргэдэ хадагаа үргэн уяжа, һайндэрэй һүр жабталантайе мэдэржэ, нангин шүтөөнэй газарһаа хүсэ шадал нэмээгээбди. Ага тосхоноо ерээд, «Магитоша» наймааһаа зэдэлһэн «сагаан эдеэгээ дэлгыт, айраг тарагаа бэлдыт» гэһэн үгэнүүдтэй дуу шагнахадаа, Сагаалганай гүн ехэ удха сэгнэн, сэдьхэлээ «харбуулһан» мэтэ мэдэрэлдэ абтахаар байгаа.

You have no rights to post comments