Онон голой эрьедэ оршодог Нуринск һууринай ажаһуугшад Баатар хүбүүгээ сэнхир хүхэ хадагаар ба эдеэнэй дээжэ болодог хүбхэгэр хилээмээр угтан абаа. Тус хэмжээ ябуулгада Эльдар Куконбековэй наһанай нүхэр Екатерина Леонидовна гурбан хүбүүдтэеэ ба эжынь Баирма Жалсановна уригдажа, хүндэтэ һуури эзэлээ.
Баяр ёһололдо Агын Буряадай тойрогой Захиргаанай хүтэлбэрилэгшэ Ананда Дондоков, Россиин Федерациин сенатор Баир Жамсуев, Үбэр Байгалай хизаа-рай амбан захирагшын орлогшо Аягма Ванчикова, Үбэр Байгалай хизаарай Хуули тогтоолгын Суглаанай түрүүлэгшын нэгэдэхи орлогшо Сокто Мажиев, «Нуринск» хүдөө һууринай захиргаанай толгойлогшо Маргарита Гаврилова, Агын, Дулдаргын, Могойтын муниципальна тойрогуудай, хүдөө һуурингуудай захиргаануудай толгойлогшонор, сэрэгэй тусхай үйлэ хэрэгтэ хабаадагшад, Баатар сэрэгшын түрэлхид, нютагайхид хабаадаа.
Эльдар Эгамбердиевич 2022 оной сентябрь һарада сэрэгтэ татагдажа, эрэлхэг зүрхэтэйгөөр Эхэ ороноо хамгаална. 2026 ондо июлиин 6-да Константиновкада баатаршалга харуулаа. Тэрэнэй захиралта доро взвод «Илалта» талмайн оршон тойронхи газарнуудые эзэлжэ, долоон үндэр байшаниие дайсанһаа сүлөөлөө. 4-дэхи амяараа мотострелково бригадын 1465-дахи мотострелково полкын 1-дэхи батальоной взводой командир, гвардиин лейтенант Эльдар Куконбеков Россиин Юрэнхылэгшэ Владимир Путинда сүлөөлһэн газарнууд тухайгаа хонходожо дуулгадаг байгаа. Эрэлхэг зүрхэтэйгөөр баатаршалга харуулһанайнь түлөө Эльдар Эгамбердиевич Куконбековтэ Россиин Федерациин Юрэнхылэгшын Зарлигаар 2026 оной августын 6-ай үдэрөөр «Россиин Федерациин Баатар» гэһэн нэрэ зэргэ олгогдоо. 2026 оной августын 27-до Кремлиин байшан соо Россиин Федерациин Хамгаалгын яаманай сайд Андрей Белоусов «Алтан Одон» медаль Эльдар Эгамбердиевичтэ зүүлгээ.
Үе бүхэн өөр өөрын баатарнуудтай. Сагһаа сагта Эхэ ороноо хамгаалһан сэрэгшэдые мартаха ёһогүйбди. Энэ ушараар минутын туршада абяагүй байлга соносхогдоо.
«...Үбэр Байгалай хизаар – Баатарнуудай газар» гэжэ дэмыдэ хэлэгдэдэггүй. Энэ таанадай аша габьяагаар гэршэлэгдэнэ. Тиигэжэ орон нютагаа суурхуулнат. Сэрэгэй тусхай үйлэ хэрэгтэ татагдаһан хүдөө һуурингуудай юрын айлай хүбүүд урдаа табиһан зорилгонуудаа үнэн сэхээр дүүргэжэ шадана. Һайнта даа. Ерээдүй һаяын сагта илалта туйлахабди, сэрэгшэднай гэртээ ерэжэ, амгалан байдалда ажаһууха гэжэ этигэнэбди. Баатар хүбүүдээрээ омогорхонобди», - гэжэ Баир Баясхаланович хэлээ.
Үбэр Байгалай хизаарай амбан захирагшын орлогшо Аягма Ванчикова ажалаараа ондоо тээ ябаһан Үбэр Байгалай хизаарай амбан захирагша Александр Осиповой зүгһөө Эльдар Куконбековтэ амаршалгын үгэнүүдые дамжуулаа, Баирма Жалсановна эжыдэнь ба Екатерина Леонидовна нүхэртэнь баярые хүргөө. Эльдар Куконбековтэ «За участие в специальной военной операции» гэһэн медаль барюулаа.
Россиин Баатарта Алдар Соло!
- Информация о материале
- Автор: Валентина ЦЫРЕНЖАПОВА.
- Категория: Ниигэм
- Просмотров: 11
