Эхын хүмүүжүүлгэһээ – Баатаршалгын зам
   - Баирма Жалсановна, Эльдар хүбүүн тухайгаа хөөрөөд үгыт.
   - Эльдар – одхон хүбүүмни. Түрэһэн үдэрынь – 1991 оной декабриин 7. 1990-ээд онуудаар гүрэн һандаржа, арад зоной байдал нилээд түгшүүрилтэй байгаа. Тэрэ үеые «Лихие-90» гээд хэлэдэг. Эльдар багаһаа хүнэй үгөөр гэхэ гү, ехээр тоомоо таһаржа ябадаггүй һэн. Һургуулиин болоходоо, үетэн нүхэд соогоо өөрэхэн, тэдэнээ дахуулхатай үндыһэн.
   Эгамберди Маслияевич нүхэртэеэ хонишоноор хүдэлдэг һэмди. Теэд яахаб, һаад тодхор ушаржа, нүхэрни аюулда ороо һэн. Тиигэжэ 10-аад жэл тухай хэбтэриин байгаал даа. Хонин ажалһаа болёобди, нүхэрөө харааб, хажуугаарнь хүүгэдээ үндылгэхэ гэжэ элдэб ажалда хүдэлөөб. Хүүгэдни намдаа тулга болодог һэн. Хүшэр сагуудые дабаһан лэ гээшэбди. Эльдарай 10-тайхан байхада, абань наһантаяа хахасаа бэлэй. Гэрэй ехэ хүүгэд, Эльдарай ахай, абгай, һургуулияа дүүргэжэ, хото городто түбхинэнхэй. Тэрэ үедэ хүбүүмни бүришье һаа намдаа туһатай байгаал даа. Газаахи, досоохи ажал бултыень хэхэдээ бэрхэ һэн. Эльдар 10-дахи ангида һуража байтараа, басагантай нүхэсэдэг болоо. Мүнөө тэрэ басаганиинь – минии бэри Екатерина. Сэрэгэй албанда татагдахын урда тээ эдэ хоёр хуби заяагаа ниилүүлжэ, айл бүлэ болоо һэн. Эльдар Бооржын сэрэгэй частьда алба хээ. Алба хэхэ үедэнь түрүүшын хүбүүн, минии аша Эрик түрөө. Мүнөө Нуринскын дунда һургуулиин 10-дахи ангиин һурагша. Тэрэнэй һүүлээр 9 жэл үнгэрөөд байхада, хоёр хүбүүд һубаряа. Эльдар сэрэгэй тусхай үйлэ хэрэгтэ татагдахын урда тээ ондоо нютагта ажал хэдэг һэн. 2022 оной сентябрь һарада сэрэгтэ татагдаа.

You have no rights to post comments