Буряад хэлэнэй фестиваль нээлгын баяр еһолол сентябриин 16-да, үдэрэй 15.00 сагта Ага тойрогой түб талмай дээрэ хабаадагшадые, айлшадые угтан абаха.

Һонирхолтой, зүрхэ хүдэлгэмэ зүжэглэмэл нээлгэ буряад арадай эхин түрүүшын һабагшын түүхэ харуулан эхилээд, саашань дуу хүгжэм, хатараар сугларагшадые баясуулха.
Мүн баһа буряад арадай ажабайдал зураглаһан үзэсхэлэн, арадай нааданууд, сомпи ба сохимол сохихо, гүрэмэл гүрэхэ, нооһоор нааданхай хэхэ мастер-классууд зоной анхарал татаха.
Жэнхэни буряад хубсаһаяа үмдэн ерэһэн айлшадые урмашуулан, лотерей наадан эмхидхэгдэхэ. Гол шан - “Дамский угодник” наймаагай алтан зүүдхэлэй талаантай эзэнээ хүлеэн байха.

Буряад хэлэнэй фестивалиин нээлгын баяр еһолол заншалта болоһон Гранд-ёохороор түгэсэхэ.

Фестиваль октябриин 21 болотор үргэлжэлхэ. 
Һарын туршада тойрогой ажаһуугшад 40 гаран зохёохы, оюун ухаанай, тамирай мүрысөөнүүдтэ хаба шадалаа туршаха аргатай. Тэрэ тоодо шүлэг уншагшад-багашуулай хоорондо «Барбаайдай»,  буряад дуу гүйсэдхэгшэдэй «Талын аялгаханууд», хүүгэдэй ёохор наадан г.м.
 
Хэмжээ ябуулганууд Соёлой үүсхэлнүүдэй Юрэнхылэгшын жасын дэмжэлтээр эмхидхэгдэхэнь.
«Бидэ 500 мянган түхэриг федеральна мүнгэ тойрогойнгоо дэбисхэр руу татажа шадаабди: «Агын залуушуул» гэһэн аралжаанай бэшэ эмхитэй суг Соёлой үүсхэлнүүдэй Юрэнхылэгшын жасын грантда хүртөөбди», - гээд Агын Буряадай тойрогой хүтэлбэрилэгшын орлогшо Билигма Будаева хэлэһэн байна. 
 
 
Фестивалиин түгэсхэлдэ эрдэмэй-дүршэл абалгын конференци эмхидхэгдэхэ. 
 

You have no rights to post comments