Анха түрүүн 1984 ондо Агын аймагай cоёлой байшанай захирал Цырендыжит Шухэртуева ехэл найдажа, Сэсэгма Жамбаловае ажалда абаа. Сэсэгма Цыдыповна Урда-Агын автоклубые даагаа. Удангүй агиткультбригадын ахалагша методистаар, аймагай соёлой байшанай ахалагша методистаар, 1996 онhоо аман зохёолоор уран hайханай хүтэлбэрилэгшөөр, 2008 онhоо захиралай орлогшоор томилогдоhон намтартай. Мүнөө арбан дүрбэн жэлэй туршада эмхидхэлэй болон методическа таhагые даажа ябана. Залууханаар нэгэтэ шэлэhэн мэргэжэлдээ энэ болотороо үнэн байhанаа гэршэлжэ, харагшадай урманда мүнөөшье болотороо үндэр тайзаниие шэмэглэhээр.
Сэсэгма Жамбалова 1958 ондо элитэ шүлэгшэн Цыдып Жамбаловай ба Норжин-Ханда Цыденовагай бүлэдэ түрэhэн. Оюун сэдьхэлэй баялигаар дүүрэн билтаржа байдаг бүлэдэ үндыhэн басаганай талаан бэлиг абаhаар лэ элирээ hааб даа. Аба эжынь хоюулаа гоё hайханаар дуу дууладаг hэн тула хүүгэдыньшье талаан бэлигыень бэедээ шэнгээhэн гээшэ. Сэсэгма басаган Агын 1-дэхи дунда hургуулиин хоорто, басагадай вокалай бүлгэмдэ ябаха. Мүн Дулма Раднаевнагай хүтэлбэри доро «Ошон» гэжэ кружогто уран үгэнүүдые үлхэжэ, шүлэгэй мүрнүүдые мүндэлүүлдэг байгаа. Шүлэгүүдээ абадаа уншажа, сэгнэлтэ абадагаа тон дулааханаар дурсан hанадаг юм. Харин Цыремпил, Цымпил, Сампил, Саян, Солбон, Дашима дүүнэрээ урдаа жэрылгэжэ зогсоогоод, дирижёр ёhоор гараа хүдэлгэжэ, дуу дуулуулдаг, гэртэхиндээ концерт харуулдагынь ерээдүйнь эхин түрүүшын алхамууд байгаал хаш. Дүүнэрэйнгээшье зохёохы замаар ажабайдалаа түхеэрhэндэнь эгэшэнь ехэтэ омогорхоно.
Билтарма бэлигтэй угһаа гарбалтай
- Информация о материале
- Автор: Цыжидма БАЛДАНГОМБОЕВА.
- Категория: Соел
- Просмотров: 15
