
Эдиршүүлэй дунда абарга бүхэ болоһон Д.Тюрбеев (баруун гарһаа). Бато ЖАМБАЛОВАЙ фото-зурагууд.
Ага тосхоной «Бүргэд» тамирай байшан соо багжагар бэетэй, шандааһатай бүхэшүүлэй барилдаанай һайндэр үндэр хэмжээндэ эмхидхэгдээ. Буряад Уласһаа, Шэтэ хотоһоо хүндэтэ айлшад тамирай һайндэртэ буужа, мүрысөө шэмэглээ һэн. Эртэ урда сагһаа дамжан ерэһэн элинсэг хулинсагай найр нааданда – бүхэ барилдаанда дуратайшуул олоор суглараа. Холо ойроһоо шамбай хүбүүд ерэжэ, хаба шадалаа туршаһан, дүрэ мэхэеэ буляалсаһан байна. Сэрэгэй тусхай үйлэ хэрэгтэ хабаадаһан, тэрэ үедэ гэртээ амаралтада ерээд байһан сэрэгшэд мүрысөөндэ уригдаа.
Үзэсхэлэн дэлгээгдээ
Мүрысөөнэй эхиндэ байшанай фойе соо «Золотые руки ангела. Агинское» ниитэ хүдэлөөнэй ба «Добрые сердца Аги» гэһэн жасын волонтёрнуудай гараар бүтээһэн сэрэгэй хэрэгсэлнүүдэй үзэсхэлэн дэлгээгдэһэн байна. Тодорхойлходо, майхан, маскировочно сеть, маскировочно халаад, бээлэй, бэеэ хамгаалха хэрэгсэл, тэрэ тоодо бронежилет, каска г.м. дэлгээтэй. «Добрые сердца Аги» жасын хүтэлбэрилэгшэ Елизавета Вырупаева айлшадта ниитэ ажаябуулга тухайгаа хөөрөө. Тэрэнэй мэдүүлһээр, зарим хэрэгсэлнүүдыень өөһэдөө оёһон, заримыень суглуулһан байна. Сугларһан хэрэгсэлнүүдээ үе-үе болоод, баруун тээшэнь сэрэгшэдтэ эльгээдэг юм. Елизавета Вырупаева өөрөө сэрэгэй тусхай үйлэ хэрэгэй боложо байһан газар руу нэгэтэ бэшэ ошожо, сэрэгшэдтэ, тэндэ ажаһуудаг зондо туһаламжа үзүүлһэн габьяатай. Үбэр Байгалай хизаарай амбан захирагша Александр Осипов үзэсхэлэн хаража, волонтёрнуудта оёдолой машина ба оёдолдо хэрэглэхэ эд абажа үгэхөөр найдуулаа.
Эрдэни ЧИМИТДОРЖИЕВ.
