МҮРЫСӨӨНЭЙ НЭЭЛГЭДЭ
   Агын дасанай Дондоков Бэлигто ба Цырендоржиев Балдан ламанар мүрысөөнэй урда тээ хии мориной сан уншажа, хүжэ ба адис ууюулжа, оршон тойрониие арюудхаба.
   Үглөөнэй 11 сагһаа эхилхэ хэмжээ ябуулгада айлшад болон заншалта хубсаһаяа үмдэнхэй хабаадагшад жагсаалда зогсобо. Тайзан дээрэ Агын Буряадай тойрогой Захиргаанай хүтэлбэрилэгшэ Базар Дугаржапов, Агын аймагай захиргаанай толгойлогшо Насак Бабужапов, Дулдаргын аймагай захиргаанай толгойлогшо Аюша Мункуев, Ага тосхоной захиргаанай толгойлогшо Андрей Дашин, Могойтын аймагай захиргаанай толгойлогшын орлогшо Баир Жаргалов, Үбэр Байгалай хизаарай тамирай үндэһэн янзануудаар олимпиин резервын һургуулиин захирал, бүгэдэ буряадай соёл хүгжөөлгын эблэлэй вице-президент Дашинима Батоболотов, бүгэдэ буряадай «Толон» һониной ахамад редактор Цыцык Тумурова, Үбэр Байгалай хизаараар һээр шаалгаар федерациин юрэнхылэгшэ, мүрысөөнэй ахамад шүүгшэ Батор Жапов тайзан дээрэ уригдаа.
   «Толон» һониной шангай түлөө мүрысөөн түрүүшынхеэ 2016 ондо үнгэргэгдэһэн юм. Тэрэ сагһаа хойшо 10 жэл үнгэрөө. Жэлһээ жэлдэ улаан гараараа һээр шаажа хухалдаг ёстой абарганууд тодордог байһаниинь мэдээжэ. Мүнөө X мүрысөөнэй нээлгэдэ абарганууд тайзан дээрэ уригдаа. Тоолобол: 2016 ондо 75 хабаадагшадһаа Ага-Хангилай Болот Будуев, 2017 ондо 120 тамиршадһаа Догой нютагай Баяр Жаргалов, 2018 ондо 135 һээршэдһээ 13-тайдаа, 2019 ондо 220-һоо 14-тэйдөө Үзөөнэй Александр Дашинимаев абарга болоһон. Саашань тоолоходо, 2020 ондо 220 һээршэдһээ Догой нютагай аха дүү Цыренжап ба Рыкзын Дарижаповууд үлэһэн байна. Тиин Цыренжап Дарижапов бүхэхэн һээр хухалжа, «Толоной» шангай түлөө мүрысөөнэй абаргын нэрэ солодо хүртэһэн. 2021 ондо 220 һээршэдһээ Сагаан-Уулын Баир Дашидоржиев шалгараа: 3,25 секунда соо 5 һээр хухалжа, VI мүрысөөнэй абарга болоһон. 2022 ондо 194 шандааһатайшуулай дундаһаа Догой нютагай Баяр Жаргалов дахяад абаргын нэрэ солодо хүртэһэн. 2023 ондо 130 тамиршадһаа Сагаан-Шулуутайн Шагдар Юндунов 4,54 секундын туршада 5 һээр дээрэ дээрэһээнь хухалжа, абарга боложо тодорһон. 2024 ондо 130 һээршэдһээ Могойтын 2-дохи дунда һургуулиин һурагша Доржи Цырендоржиев 50 һээр хухалжа, абарга болоһон байна. Хэр угһаа буряад арад хүндын тэмдэг – хүхэ сэнхир хадагаар золгодог. Тиимэһээ тайзан дээрэ зогсоһон айлшадые ба абаргануудые «Толон» һонинойхид хүхэ хадагаар золгоо.

   Валентина ЦЫРЕНЖАПОВА.

You have no rights to post comments