Буряад хэлэеэ ходо үргэжэ ябахаб 

   Дэлхэй дээрэ элдэб олон хэлэнүүд бии. Минии һанахада, хүн бүхэн түрэл хэлэеэ мэдэхэ ёһотой. Аба эжы хоёрни намайе бага наһанһаам буряад хэлэндэм һургаһан. Тиимэһээ би буряад хэлээр элдэб конкурснуудта хабаададагби. Мүнөө олон залуушуул ородоор дуугардаг болонхой. Тиигэжэ буряад хэлэмнай үсөө хэрэглэгдэнэ. Бидэ түрэл хэлэеэ абархын тула ганса буряад хэлэн дээрээ дуугаржа, ном уншажа, дуу шагнажа, хүүгэдтэеэ ба жаахан дүүнэртэеэ үндэһэн наадануудые наадажа ябаха ёһотойбди.

   Мүнөө нүхэр басаган тухайгаа хөөрэхэм. Нүхэрни бага наһанһаа ганса ородоор дуугардаг. Буряад хэлэнэй хэшээлдэ муугаар ойлгодог һэн. Багшын «Юундэ буряад хэлэ үзэнэгүйбши?» гэжэ һурахада: «Намда буряад хэлэн хэрэггүй!» – гэжэ харюусадаг байгаа. Теэд удангүй зун лагерьта амархаяа ошоо. Тэндэ заабол түрэл хэлэн дээрээ дуу дуулаха ёһотой байгаа. Тэрэнэй һүүлээр буряад хэлэеэ үзэжэ эхилээ. Хаанашье ябахада, түрэл хэлэн хэрэгтэй гэжэ нүхэрни ойлгоо.

   Би буряад хэлэндээ дуратайб! Түрэл хэлэмни – минии баялиг. Буряад хэлэн дээрээ хөөрэлдэжэ байхада, жэгтэй гоё. Хаанашье ябаа һаа, буряад хэлэеэ ходо үргэжэ ябахаб! 

   Доржима ДАМДИНОВА, 

   Амидхаашын дунда һургуулиин һурагша.

You have no rights to post comments