- Намсалма Дамбиевна, хаанахи, алид болонобта?
- Би Yзөөн нютагта 1950 ондо хальбан омогой Дамбиин Дамдинцыренэй гэр бүлэдэ түрэhэнби. Эжымни Сэрэн гэжэ нэрэтэй, бодонгууд омогой, Гомбын Жамбал-Доржи хамба ламын дүү басаган байhан. Абамни Солонгос дайнда ябаhан, хамтын ажахыда комбайнераар, эжымни хилээмэ баригшаар ажаллаhан.
- Гэр бүлэ тухайгаа хөөрыт даа.
- Нүхэрни - хүбдүүд омогой Бадмацырен Цынгуев, намтай сасуу юм. Зүдхэли нютагай, нютагтаа бригадираар, барилгашанаар ажаллаhан. Хүүгэдэй бага байхада, ехэнхидээ Бадмацырен абаhан, юундэб гэхэдэ Зүдхэлиин «Родина» хамтын ажахын 60 буусаар агитбригадада ябадаг hэнби. Малшад агитбригадые аргагүй хүлеэдэг байгаа. Мүнөө хамтын ажахынуудай ажал урдын сагhаа бараг болоо гэжэ hанадагби. Гурбан хүүгэдые хүмүүжүүлhэмди. Даши ехэ хүбүүмнай олон дуу зохёоhон, Зүдхэлиингөө соёлой байшанда арбан зургаан жэл уран hайханай хүтэлбэрилэгшөөр хүдэлөө, мүнөө Дулдаргын МЧС-тэ хүдэлдэг. Суранзан басагамнай Дулдаргын 2-дохи дунда hургуулида бухгалтераар ажаллажа байhанаа, мүнөө Москва хото ошоо. Бальжима одхон басагамнай Агын «Баатар» түбтэ ажалладаг. Хүүгэднай булта дууладаг, хоолой hайтайнууд юм, арбаад аша зээнэртэйбди.
- Анхан яагаад театральна мэргэжэл шэлээ һэмта?
- Минии эжы арадай дуу дууладаг hэн, анханhаа дуулаха дуратай байгааб. Yзөөнэйхид «Гомбын Сэрэн абгай - бүхы түрэ найрай зонхилогшо, Сэрэн абгайгүйгөөр түрэ болодоггүй hэн» гэжэ хөөрэлдэдэг байһан. Тиихэдэ Светлана Ламожаповна Жигжитова гэжэ бэрхэ хүгжэмэй багшатай байгааб, тиигэ тиигэhээр соёлой хүдэлмэрилэгшэ болоолби даа. Театральна урлалай хоёр hургуулитайб. 1972 ондо Шэтын соёл-гэгээрэлэй училищи түгэсхэжэ, Зүдхэли нютаг эльгээгдээб. Хүүгэдэйнгээ томохон болоходонь, Улаан-Yдын Зүүн Сибириин гүрэнэй соёлой ба урлалай дээдэ hургуулиин театральна таhаг 1989 ондо заочноор дүүргээб.
- Режиссёрой ажал хүндэ гү?
- Бүхы тээ режиссёрой гар хэрэгтэй юм. Жэшээнь, уран hайханай харалга-мүрысөөнүүдтэ тайзан дээрэ яагаад ябахаб, дохихоб гэхэ мэтые заадагби. Соёлой байшанда табан хүн ажалланабди, бүхы ажалаа хамhажа хэдэгбди. «Морин эрдэни» гэhэн мориной тоног зэмсэгэй харалга-мүрысөөнэй хабаадагшадта хубсаhа урлан оёхо, харалгада хүгжэм тааруулха гэхэ мэтэ ажалнуудые булта хамhадагбди.
- Зүжэг табиха талаар юун гэжэ хэлэхээр бэ?
- Олон хүн арадай театртамнай хабаадаhан, 50 гаран зүжэг табиһан байхабди, жэлэй нэгэ томо зүжэг табидагбди, наадагшаднай мүнөө наhатайнууд болоо. Исай Калашников, Хоца Намсараев, Базар Барадин, Даширабдан Батожабай гэхэ мэтэ элитэ уран зохёолшодой, драматургнуудай зүжэгүүдые бэлдэжэ, олондо харуулhамди. Һүүлэй арбан жэл соо коллектив шэнэлэгдээ. Хорин хүн ябана, тэдэ булта зүжэг бүхэндэ хабаададаггүй, зоноо мэдэхэ байхадаа, дүрэнүүдтэ хүниие тааруулдагбди. Ород хүнэй абари зан харуулха гээшэ бидэндэ, буряадуудта, хүндэ байна. Президентын грантаар манай соёлой байшан шэнэ автоклубтай болоо, нютагуудаар наада гаргаа hэмди. Энэ хадаа hайн унаа, харин гурбан лэ хүн hуугаад ябаха аргатай. Минии хүдэлөөн соо гурбадахи автоклубнай болоно. Зохёолнуудые уншажа, тэдэниие зүжэг болгожо бэшэхэ гээшэ хүндэл байдаг даа. Мүнөө зүжэгүүдэй репертуар хомор болоо, табиhанаа дахин табиха аргагүй, тиигээшье hаа саарhануудые харанаб, бэдэрнэб. Комеди наадахада орёо, табихада хүндэ, теэд ехэ үндэрөөр сэгнэгдэдэггүй.
- Залуу соёлшодто ямар зүбшэлнүүдые үгэхэ байнабта?
- Хүдэлхэ хүн хүдэлхэл байна. Хүн сүлөөгүй, ажалтай байха ёhотой гэжэ hананаб, ажалгүй байхадаа, залхуу болошохо, зон соо ябахада hайн. Гомбын Жамбал-Доржи хамба лама нагасамни: «Хэхэ ажалаа хээд лэ, хүн бүхэндэ - ноёншье, нохойшье байг - адляар хандаха ёhотой, тиихэдээ урагшатай ябахаш» гэжэ заагша hэн.
- Театраараа холо ойгуур хаагуур ябаhамта?
- Монгол, Башкири, Буряад орон, Шэтэ гэхэ мэтэ газарнуудаар ябаhамди. Хари газараар, тала дайдаар ябажа ерэхэдээ, ехэ зоригжол түрэдэг. Наhатайшуулдаа нюдэн галтай, шэхэн hонор, ухаан түгэлдэр, амгалан тэнюун ажаhуугыт даа гэжэ үреэе.
Цымжидма ДОЛГОРОВА.
