Минии һанахада, багша байхань бэлэн бэшэ мэргэжэл. Багша болохын тула шанга, бэрхэ байха ёһотой. Хүүгэдые ойлгохо, хэлэеэ ойлголсохо гээшэ хатуухан ажал юм. Һургуулида орохоһоонь хойшо эжынь мэтэ, ганса ухаатай болгодог бэшэ, һургаал заажа үндылгэдэг гээшэ. Һайн багшын хүндэдэ хүртэхын тула арбан хүлһэ адхаха хэрэгтэй.
   Буряад хэлэнэймнай багша Мыдыгма Ринчиновна Балданова бэрхээр заадаг. Номдо шэнги ехэ мэдэсэ толгой соогоо хадагаланхай. Буряад хэлэндэ дуратай болгодог. Юумэнэй боложо үгэхэгүйдэ туһалдаг, заадаг. Зөөлэн, номгон зантайшье һаа, хүүгэдые шангаар, гурим журамтайгаар баряад байдаг.
Энэ мэргэжэлдэ сэдьхэлни бага наһанһаам таталдадаг. Би буряад хэлэнэй багша болоо һаа, хүүгэдтэй хэлэеэ ойлголсохые оролдохоб. Өөрынгөө хүүгэдтэ мэтээр хандахаб. Һургаал заабари заахаб. Буряад хэлэмнай хосоржо байна, мүнөөнэй хүүгэд түрэл хэлэеэ мэдэхэеэшье болинтобо. Тиигэхэгүйнь тула үхибүүдые түрэл хэлэндэнь һургахаб, саашань хүүгэдтээ дамжуулхыень захихаб. Минии жэшээ болохо Мыдыгма Ринчиновна багшадаа адли бэрхэ багша болохые оролдохоб. Хэдышье эсээ һаа, һурагшадтаа эсэһэнээ харуулдаггүй. Бидэнэйнгээ түлөө оролдодог.
   Түрэл хэлэеэ мэдэхэ байһандаа аба эжыдээ, буряад хэлэнэй багшадаа баяртай байдагби.
   Һургуулидамнай буряад хэлэн дээрэ зүжэгэй мүрысөөн үнгэргэгдөө һэн. Энэ ажал Мыдыгма Ринчиновна хүтэлэн ябуулаа. Дүүргэжэ ошоһон һурагшад арбан нэгэдэхи ангиин байхадаа, «Француз хэлэнэй хэшээлнүүд» гэжэ гоё зүжэг харуулаа һэн. Харагшад нулимсаяа дуһаагаа, энэ зүжэг зүрхэ сэдьхэлыень хүдэлгөө бэлэй. Энэ зохёол бидэ наймадахи ангида уншаа һэмди. Француз хэлэнэй багша Лидия Михайловна – эрхим жэшээ: һурагшынгаа хойноһоо һанаагаа зобожо, эдеэ хоолооршье туһалха гэжэ оролдоо бэлэй. Һүүлдэнь мүнгөөр наадажа, зорюута шүүгдээд, мүнгөөр тэдхээ һэн. Иимэ багшанар сэнтэй.
   Хэдэн жэлэй саана Бесланда терророй болоходо, Ага нютагаймнай зүрхэтэй, бэрхэ багша Дарима Аликова-Базарова хүүгэдээ абаржа ябаһаар, ами наһаяа үгөө һэн. Һаруул дурасхаалынь хэтэ мүнхэдөө үлөө. Энэ багша бултандамнай жэшээ байха ёһотой.
   Балжит Жигдылмеева, Һүдэнтын дунда һургуули.

You have no rights to post comments