Тиихэдээ аргал түүхэдээ хэрэглэдэг, зорюута зохёоһон араг нюргандаа үргэлдэг һэн ха. Тэрээн соогоо олоһон аргалаа суглуулдаг байгаа. Буряад-монголшуудай ажабайдалда аргал ехэ ашаг туһа үгэдэг. Тэдэ аргалаар гал түлижэ, эдеэ хоол шанадаг, унай табижа, боргооһо батаганаа үргөөдэг, элдэһэн арһа утажа, үнгэ оруулдаг байһан гэхэ мэтэ ашаг туһыень нэрлэхэ болоо һаа, нилээд олон.
«ВКонтакте» сайтын «Буряад аман зохёол» бүлэг соо Цырен-Ханда Дарибазаровагай бэшэһэн «Аргал тухай» толилолгоһоо ойлгоходо, Энэдхэгэй эрдэмтэ доктор Шарма Монголһоо аргал абаашаад, уушханай үбшөөр үбдэһэн хүнүүдые аргалхадаа, аргалай утаа хэрэглэжэ, тэрэнэй эдэгээхэ шадалтай байһые харуулжа, ехэ гайхуулһан байна. Мүн Япониин эрдэмтэн аргалай утаа шэнжэлжэ үзөөд, элдэб үбшэнүүдэй вирус усадхаха аргатай байһые элирүүлээ… «Ондо ондоо нютаг ороной малай шабааһан тон тиимэ шанартай байхагүй, газар газарай үбһэ ногоонһоо дулдыдаха гэжэ мэдээжэ. Хада уулаар бэлшэжэ, хоморой хадын ургамал эдидэг һарлаг үхэрэй аргал бүришье баян бүридэлтэй, аяар 200 түрэлэй эмэй ногоонһоо бүридэдэг ха…» – гээд «Буряад аман зохёол» бүлэг соо бэшээтэй.
Валентина ЦЫРЕНЖАПОВА.
