Түл абалгын хаhада зорюулан, мал ажалай мэргэжэлтэдэй болон малшадай дунда асуулта эмхидхэбэбди:
- Түл абалгаар ямар түсэбтэй байнабта?
- Түл абалгын үедэ шиидхэгдээгүй ямар асуудалнууд гарадаг бэ?
- Танай hанамжаар, хүдөөдэ мал харахаар гү?
Зугаалай нютагай фермер, тогтор хуасай омогой, 61 наhатай Цыренжап Загдаев:
Гэр бүлын архивай фото.
- Гахай, хуса, hүүлдэнь эхэ хонидые харууһалаад, мүнөө агын үүлтэрэй шэрүүн нооhотой эхэ хонидые үсхэбэрилнэбди. Зуун эхэ хонинhоо зуун ба олоншье хурьга абантадагбди. Мүнөө жэл баһа абахабди гэжэ найдагдана. Харин элдэб саг болодог. Мүнөө жэл хонидой түрэлгэ апрелиин 1-hээ майн 1 болотор үргэлжэлхэ. Үмсөөрөө байхадаа, өөhэдтөөл найданабди. Арба гаран жэл эхэ хонидые хаража байнабди. 2017 онhоо фермернүүд болоhомди.
Мүнөө 400 гаран толгой хонитойбди. Намар хүгшэн хонидые тушаагаад, залуу эхэ хонидые үлөөдэгбди. Хуса нэгэ hарын туршада табигдадаг. Агын үүлтэрэй шэрүүн нооhотой хонид нарин нооhотой хонидhоо боро шэрхи, хүйтэндэ ядадаггүй. Эхэнь хурьгадтаа мээхэй. һайн түл абахын тула хонидоо намар таргалуулха ёһотой, hайн хуса хэрэгтэй.
Обёос 50 гектар газарта таригдадаг. Тиихэдээ обёостой, hолоомотойшье байдагбди. Обёос хуряагаад, хонидоо поли дээрэ табидагбди. Хүйтэн болоходо, үбhэ, обёос эдеэ ааб даа. Оролдосо гаргажа, саг соонь эдеэлүүлжэ, адуулжа байхада, харюутай байдаг лэ даа. Байрыень сэбэрээр, дулаанаар байлгаха хэрэгтэй.
Хонидоо аргалха бүхы эмүүдые абаад байдагбди. Жэшээнь, хурьгад шэшэхэеэ hанадаг. Саг соонь тарилга хэхэ шухала болоно. Намар зохолой хорхойень hалгаха, шүлхыһөө һэргылхэ г.м. тарилганууд хэгдэдэг. һүүлшын 5 жэл өөhэдөө хонидоо түрүүлнэбди, урда тээнь нэгэн-хоёр сакманщигууд ерэдэг hэн. Мүнөө хомор болонхой.
һая эхилжэ байhан фермернүүдые дэмжэхэ зорилготой программаар 2017 ондо Үбэр Байгалай хизаарай гэр бүлын грантда хүртэжэ, «Беларусь» трактор бүхы түхеэрэлтэнүүдтэйнь абаа hэмди.
Хүдөөдэ мал харахаар. Үмсэдөө ажал хэжэ байхада, хэзээшье, урматай. «Мал хараха - ама тоhодохо» гэжэ арадай сэсэн үгэ байха. Оролдоод лэ, һайнаар хүдэлхэдэ, мал харюутай байдаг.
Россиин Хүдөө ажахын яаманай баярай бэшэгээр болон Хүндэлэлэй грамотаар шагнагдаhан, Цындыма нүхэртэеэ «Инаг дуранай ба үнэн сэхэ байhанай түлөө» гэhэн медальда хүртэhэн байнабди.
Нордоп БАБУЕВА.
