Агын аймагта, «Руно» эмхиин бааза дээрэ нооһоор нэхэһэн эд үйлэдбэриин цех апрелиин 14-дэ нээгдэхэнь.
Эндэ һая хизаарай хүдөө ажахын сайд Денис Бочкарёв албан хэрэгээр Агын аймагаар ябахадаа, цехэй ажаябуулгатай танилсаа.
Цехые даагша Эржена Ханай тэмдэглэһээр, эндэ нооһон малгай, шарф, кофтонуудые, плед нэхэжэ эхилэнхэй.
Э.Хан эдтэеэ танилсуулна.
«Ажаһуугшадайнгаа эрилтэдэ таарама хубсаһа үйлэдбэрилхэ түсэбтэйбди. Үйлэдбэриин хэрэгсэлнүүднай орёошье оёлготой хубсаһа нэхэхэ аргатай. Бүри Wildberries компанитай хэлсэбэбди, ерэхэ зунһаа үйлэдбэрилһэн эдээ энэ Интернет талмай дээрэ худалдахабди», - гэжэ олзын хэрэг эрхилэгшэ хэлэнэ.
Энэ түлэблэлэй бюджет 17,8 сая түхэригэй болоо, тэрэнэй 16 саянь хизаарай үйлэдбэри хүгжөөлгын жасын урьһаламжа, 1,8 саянь – өөрын мүнгэн.
Дарима БАЗАРОВА.
