Тамын далайе гаталалга
Тэрэ 1933 оной эсэстэ Эрхүүгэй можын Балаганска аймагай Молько һууринда алтан дэлхэйн шарай хараһан намтартай. 1938 ондо тэрэнэй таба наһаяа һаял гүйсөөд байхада, барагар хара шарайтан гэртэнь ерэжэ, эсэгыень ямаршье шалтагаангүйгөөр тушааһан байна. Бага балшар дүрбэн үхибүүдтэеэ үлэһэн эжынь (Мария Инкеева) тэдэнээ үхэлэй һабарһаа абархын түлөө ехээр тухашарһыень хэдыхэн үгөөр хэлэхын аргагүй. Ажабайдалай хүндэ ашаа тэсэнгүй, үбшэндэ нэрбүүлһэн эжынь 1942 ондо наһа баража, үншэн хэнзэ үлэһэн үхибүүдтэ үшөөшье хүшэр байдал тохёолдобо. Тиихэдэ Клим юһэ наһа хүсэд гүйсөөдүй ябаа. Хожомоо тэрэ үншэн үлэһэн 3 эгэшэ дүүнэртэеэ туража үхөөгүйгөө гайхадаг һэн. Бага ангинуудта һураха үедэнь хэшээлдээ бэлдэхэ тухай мэдэрэл ухаандань хомор ородог һэн ха. Гансал үдэшэлэн ямар юумээр үл залгаха тухай бодомжолхоһоо ондоо хүсэл байгаагүй. Таряалан дээрэ үлэһэн хоолос суглуулха, хүлдэһэн хартаабха газар дороһоо малтажа суглуулаад, тэрэнээ шаража эдихэ. Ном дэбтэрээ хээд ябаха сүүмхэ-портфельгүй дээрэһээ һуралсалайнгаа хэрэгсэлнүүдые ходол үбэртэлөөд ябаха.
Братска ГЭС-эй баригдаха жэлнүүдтэ Молько һуурин уһанда абтажа, Олзоевтоной үншэн хэнзэ үхибүүд хүршэ Оһын аймагай Бэлшэр нютаг зөөхэ баатай болобо. Тиигэжэл тэдэнэр тэндэ ан-бун түбхинэһэн түүхэтэй.
(Үргэлжэлэлынь 5-дахи дугаарта уншахада болохо).
Батожаргал ГАРМАЖАПОВ.
