Илангаяа Орловскын хүүгэдэй (багшань - Ц-Д.Цынгуев) дархалһан модон аяга, табаг г.м. тэрэ дороо худалдагдаа. Тойрогой һургуулиин үхибүүд гараараа дархалалга, оёдол хэхын хажуугаар 3D принтер, токарна, лазерна г.м. станогуудые ба шэнэ технологи хэрэглэжэ, элдэб эдлэл, урлал хэжэ һурана.
Орловскын үхибүүдэй хэһэн модон амһарта. Жалсан Лубсандашиевай фото.
Агын хүүгэдэй урлалай байшанай хүмүүжэмэлнүүдэй хэһэн сүүмхэ.
Үзэсхэлэн-яармагай дүнгүүд «Түмэр эд», «Гар бэлэг», «Арһан эд», «Модоор хэһэн эдлэл» гэхэ мэтэ 14 янзаар татагдажа, Агын Буряадай тойрогой Захиргаанай зүгhөө эдлэл уранаар хэһэн һурагшад ба багшанар урмашуулагдаа. Түрүү һуури эзэлһэн зарим һурагшадые нэрлэбэл, Үзөөнэй дунда һургуулиин 8-дахи ангиин басаган Лариса Шагжаева багшынгаа ударидалга доро буряад хубсаһа оёжо асараад, Ага тосхоной талмай дээрэ нахис-хотос алхалжа харуулаа. Агын 2-дохи дунда һургуулиин 8-дахи ангиин һурагша С.Батоболотова – нооһоор, Ушарбайн дунда һургуулиин һурагша П.Батомункуев – түмэрөөр, Хүнхэрэй дунда һургуулиин Ч.Батоева – арһаар, Ага-Хангилай 7-дохи ангиин һурагшад эбэрээр эд хэжэ шалгараа. Хүнхэрэй дунда һургуулиин багша Жаргалма Чирнинова - «Технологиин эрхим багша», Үбэр-Аргалиин дунда һургуулиинхид - «Эрхим кабинет», И.Д.Кобзоной нэрэмжэтэ Агын ДДТ - «Эрхим нэмэлтэ hуралсалай эмхи» гэһэн янзануудаар түрүү зэргэдэ гаража, 1-дэхи шатын дипломуудта хүртэбэ.
Жалсан ЛУБСАНДАШИЕВ.
