Сентябриин 16-ай үдэр баяр ёһололой оршон байдалда Агын аймагай шэнэ маягаар зохёогдоһон номой сангай нээлгэ болоһон байна.
Энэ баяр баясхаланта хэмжээ ябуулгые «Агын аймаг» муниципальна аймагай захиргаанай толгойлогшо Жаргал Жапов нээхэдээ: «Модельнэ номой сангай нээлгэ гүрэнэй болон муниципальна засаг зургаануудай хамтын ажаябуулгын дүн болоно. Конкурсдо хабаадахын тула хамтын хүсөөр тон хэрэгтэй эрхэ нүхэсэл байгуулжа шадаабди», - гэжэ тэмдэглээ.
Һануулхада, аймагай номой сан «Культура» үндэһэн түлэблэлэй хэмжээндэ үнгэргэгдэһэн модельнэ номой сан байгуулгаар федеральна конкурсын шэлэлгэ гаража, илагшадай тоодо ороһон байна.
Аймагай номой сангай ажалтадай баяртай хубаалдахаяа Агын Буряадай тойрогой Захиргаанай хүтэлбэрилэгшэ Буянто Батомункуев, сенатор Баир Жамсуев, Үбэр Байгалай хизаарай губернаторай орлогшо Аягма Ванчикова, хизаарай соёлой сайд Ирина Левкович, лама санаартан, ажаһуугшад суглараа. Баир Баясхаланович Үбэр Байгалай хизаарта түрүүшын модельнэ номой сангай нээгдэжэ байһые, мүн тус номой сангай ажалтадай горитой ажал ябуулһые тэмдэглэһэн байна.
Долгор РАДНАБАЗАРОВА.
