Сентябриин 16-да адаптивна ба тамирай үндэhэн янзануудаар олимпиин резервын hургуулиин байшан соо Буряад хэлэнэй фестивалиин нээлгэ үнгэргэгдөө.
Арба гаран жэлэй түүхэтэй Буряад хэлэнэй фестиваль сентябриин 16-hаа октябриин 21 болотор үргэлжэлхэ юм.
Буряад хэлэнэй фестиваль мүнөө жэл соёлой үүсхэлнүүдые дэмжэхэ Президентын жасын туhаар үнгэргэгдэнэ. Фестивалиин нээлгэдэ засаг зургаанай хүтэлбэрилэгшэд, орлогшонор, дээдэ ба дунда hургуулинуудай хүдэлмэрилэгшэд, hурагшад, оюутад, сурбалжалагшад хабаадаа. Фестивалиин нээлгээр сугларагшадые Агын Буряадай тойрогой Түлөөлэгшэдэй суглаанай түрүүлэгшэ Цырен Цыренов, Агын аймагай захиргаанай толгойлогшын орлогшо Дарима Дугарова, Агын дасанай ехэ гэсхы Чингиз лама гэгшэд амаршалаа.
Агын тойрогой Захиргаанай хүтэлбэрилэгшын орлогшо Билигма Будаевагай тэмдэглэhээр, фестивалиин үедэ тойрогой дэбисхэр дээрэ тамирай, оюун ухаанай, зохёохы – хамта 40 гаран хэмжээ ябуулга үнгэргэгдэхэ. Тэдэнэй тоодо – хүүгэдэй дунда «Барбаадай» шүлэгэй ба буряад онтохонуудаар зурагай, буряад дуунай «Талын аялгаханууд, уран уншагшадай «Агамни, шамдаа» конкурснууд болон хүүгэдэй ёохорой фестиваль.
«Залуу үетэниие, гэртэхиниие түрэл хэлэеэ хүгжөөхэ хэрэгтэ олоор хабаадуулхань шухала. Гэр бүлэдөө, нүхэдэйнгөө дунда түрэлхи хэлэн дээрэ хөөрэлдэхыетнай уряалнаб», - гэжэ Билигма Будаева хэлээ.
Фестивалиин үедэ гэр бүлэдэ онсо анхарал хандуулагдаха. Гэр бүлын можонууд элдэб конкурснуудта ба мүрысөөнүүдтэ хабаадаха юм. Жэшээнь, эжынэр басагадтаяа «Эхын hургаал», абанар хүбүүдтэеэ «Эсэгын hургаал» конкурснуудта шадабарияа харуулха бшуу. Сүлжээ холбоондо «Бидэ гэр бүлөөрөө…» гэhэн челлендж ябуулагдаха.
Фестивалиин нээлгэдэ хабаадагшад шагай наадаха, сомпи гүрэхэ, эхэнэрэй ба бүhэтэй хүнэй үндэhэн буряад хубсаhанай стендын хажууда фото-зурагаа абхуулха аргатай байгаа. Мүн буряад номууд, уран гартанай бүтээлнүүд дэлгээгдээ.
Хэмжээ ябуулгын түгэсхэлдэ лотерей наадан үнгэргэгдөө. Буряад дэгэлтэй, али hажаалгажа оёһон хубсаhатай зондо биледүүд тараагдаа. Шүүхэ азатай зон элдэб бэлэгүүдтэ хүртөө. Эгээ сэнтэй бэлэгүүд гэхэдэ, «Дамский угодник» наймаагай алтан, мүнгэн зүүдхэлнүүд байгаа.
Һайндэр бултаниие нэгэдүүлhэн ёохор хатараар түгэсөө.
Нордоп БАБУЕВА.
