Зүблөөндэ Үбэр Байгалай хизаарай Хуули тогтоолгын Суглаанай түрүүлэгшэ Кон Ен Хва, РФ-гэй сенатор Баир Жамсуев, Үбэр Байгалай хизаарай Засагай газарай түрүүлэгшын орлогшын – Агын Буряадай тойрогой Захиргаанай хүтэлбэрилэгшын уялга дүүргэгшэ Базар Дугаржапов, Үбэр Байгалай хизаарай Хуули тогтоолгын Суглаанай 3 зарлалай депутат, Агын Буряадай тойрогой Түлөөлэгшэдэй суглаанай 3 бүридэлэй түрүүлэгшэ Цырен Цыренов, Үбэр Байгалай хизаарай Хуули тогтоолгын Суглаанай 3 зарлалай депутат, Агын Буряадай тойрогой Түлөөлэгшэдэй суглаанай 2 зарлалай гэшүүн Дарима Доржиева, гадна аймагуудай, «Ага тосхон» хотын тойрогой захиргаануудай толгойлогшонор, территориальна ба федеральна зургаануудай хүтэлбэрилэгшэд, хотонуудай ба хүдөө һуурингуудай зүблэлэй түрүүлэгшэнэр уригдаһан байна.
Зүблөөндэ зүбшэлгын ба зүблэлэй зургаанай шэнэ бүридэл, комиссиин орлогшонор ба түрүүлэгшэнэр һунгагдаа, гадна 2024 оной түрүүшын хахад жэлэй ажалай түсэб харагдаа.
Ноябриин 23-да Хуули тогтоолгын Суглаанай ээлжээтэ сессидэ Агын Буряадай тойрогой Түлөөлэгшэдэй суглаанай шэнэ бүридэл баталагдаһан байна. Хуули тогтоолгын Суглаанай уставаар суглаанай бүридэлдэ 15 хүн ороно.
Сенатор Баир Жамсуев иигэжэ хэлээ: «Түлөөлэгшэдэй суглаан эдэ жэлнүүдтэ хэрэгтэй байһанаа гэршэлһэн зургаан юм.
Агынхид заншалта ёһоор мал ажахы хүгжөөдэг. Тойрог хүдөө ажахы хүгжөөхэ һайн эрхэ нүхэсэлтэй. Хүдөө ажахын үйлэдбэрилэгшэдые, газар элдүүрилдэг ажалтай холбоотой зониие дэмжэхэ гээшэ тойрогой засаг зургаанай, тэрэнэй тоодо Түлөөлэлгэтэ суглаанай шухала зорилго болоно. Хүдөө ажахын үйлэдбэри хүгжөөлгэдэ хэрэгтэй эрхэ нүхэсэл байгуулга нэтэрүү ажалһаа, үүсхэлһээтнай дулдыдаха». Тиигээд Цырен Цыреновэй хүтэлбэри доро хүдэлһэн Түлөөлэгшэдэй суглаанай гэшүүдтэ баярые хүргөөд, шэнэ бүридэлдэ Агын тойрогой, Үбэр Байгалай, гүрэнэй хүгжэлтэдэ амжалтатай хүдэлхыень хүсөө.
«Гүйсэдхэхы болон хуули тогтоолгын зургаануудай үрэ дүнтэйгөөр хүдэлэлгэ тогтууритай байдалай болон ямаршье территори хүгжөөлгын найдамжа (гарантия) үгэнэ. Урдамнай хамта шиидхэхэ олон зорилгонууд байна. Бултандаа аша үрэтэйгөөр хүдэлхые хүсэнэб», - гэжэ Базар Дугаржапов тэмдэглээ.
Түлөөлэгшэдэй суглаанай шэнэ бүридэлэй түрүүлэгшээр Үбэр Байгалай хизаарай Хуули тогтоолгын Суглаанай депутат Жаргал Жапов һунгагдаа, орлогшоорнь – Жаргал Жигжитжапов.
Цырен Цыренов тойрогой, Үбэр Байгалай хизаарай Түлөөлэгшэдэй суглаанай шэнэ бүридэлэй амжалтатай хүдэлхые хүсөө. Үбэр Байгалай хизаарай Хуули тогтоолгын Суглаан Агын тойрогой Түлөөлэгшэдэй суглаа 2009 ондо байгуулһан, Агын тойрогой түлөөлэлгэ Үбэр Байгалай хизаарай Устав соо ганса гүрэнэй засагай гүйсэдхэхы зургаан бэшэ, зүбшэлгын ба зүблэлэй зургаан гээд оруулагдаһан тухай онсолон хэлээ. Түгэсхэлдөө Цырен Цыренов һүүлшын зарлалай ажаябуулгаар тоосоо юм.
Кон Ен Хва олон жэлэй туршада хүдэлжэ, хуули шэнэдхэлгын ажалда амжалта туйлаһан болон эрхэтэнэй эрхим үзэлтэй байһанайнь түлөө Үбэр Байгалай хизаарай Хуули тогтоолгын Суглаанай 3 зарлалай депутадууд Цырен Цыренов, Дарима Доржиева гэгшэдтэ Үбэр Байгалай хизаарай Хуули тогтоолгын Суглаанай Хүндэлэлэй грамотануудые барюулаа.
Нордоп БАБУЕВА.
