Буряад хэлэнэй һургуулиин нээлгын үедэ.
«Байкал» бүлгэмэй тамиршад. «Байкал» бүлгэмэй архивай фото-зурагууд.
Камчаткада түбхинэһэн нютагаархиднай үндэһэн наадаяа Буряад Уласай байгуулагдаһаар 100 жэлэй ойдо зорюулаа.
Холын энэ хизаарта 130 гаран үндэһэ яһатанай түлөөлэгшэд ажаһуудаг. Тэдэнэр хоорондоо эбтэй, бэе бэеэ дэмжэдэг, харилсадаг заншалтай. Нютаг зонойнгоо бүлгэм 30 жэлэй саана байгуулжа хүтэлбэрилһэн, эдэбхитэдэйнгээ ажал халан абаһан мүнөө үеын урагшатай ударидагшад, гэшүүдынь ёһо заншалаа һайнаар сахижа ябаһаар юм. Камчаткын хизаарай буряадуудай «Байкал» бүлгэмдэ Үбэр Байгалай хизаарай, Буряад Уласай, Эрхүүгэй можоһоо 300 гаран хүн ородог.
Камчаткын буряадуудай бүлгэм «Сурхарбаан» наада дүрбэдэхи жэлээ зоной зунай амаралтаһаа бусаһан хойно, олон нютагайхидайнгаа загаһа барилгын кампани дүүргэжэ ерэхэдэ эмхидхэхэ гэһэн шиидхэбэри абаһан. «Байкал» бүлгэм байгуулагша ба түрүүлэгшэ Валерий Галсанов иигэжэ хэлэһэн байна: «Үбэр Байгалай хизаарһаа, Буряад Уласһаа, Эрхүүгэй можоһоо гарбалтай зон суглардаг, нүхэсэдэг, ханилдагбди. Мүнөө жэл бидэ нэгэ шажантай, адли ёһо заншалнуудтай тува яһатантай хамтаржа, һайндэрөө үнгэргөөбди. Бидэ ондоо яһатанай ёһо заншалнуудаар һонирходог, тэдэнииень үзэдэг, арга шадалаараа бүлгэмдэнь хамһалсадагбди. Энэ хадаа нютаг можодомнай ажаһуугшадай хани барисаанай болон бэе бэеэ ойлголсолгын тэмдэг болоно бшуу».
Валерий Галсанов Камчаткын хизаарай түб хотын хүндэтэй ажаһуугшадай нэгэн юм. Тэрэ олон жэлэй туршада консервнэ завод ударидаһан, ажахы хүтэлбэрилхэ шадабаритай, ганса үйлэдбэриин бэшэ, харин ниитын ажаябуулга эмхидхэгшэ юм. Валерий Галсанов нүхэдтэеэ, эдэбхитэдтэй «Байкал» бүлгэмөө дээдэ хэмжээндэ гаргаһан. Тус бүлгэм 20 гаран үндэһэтэнэй бүлгэм нэгэдүүлһэн «Содружество» гэһэн нютаг можонуудай ниитэ эмхидэ ородог.
Һайндэрэй хэмжээ ябуулгануудай урда тээ Буряад Уласай Булат лама ба тува яһатанай Мерген лама энэ нютагта ажаһуудаг зоной амгалан тайбан ба эбтэй эетэй байхын, сэрэгшэ хүбүүдэйнгээ Украинаһаа амиды мэндэ, элүүр энхэ бусахын түлөө уншалга үнгэргэһэн байна. Арбан жэлэй саана Елизовын харгыгаар хотоһоо 20 модо зайда Алас Дурнын нютаг можо соо түрүүшын субарга бодхоогдоо һэн. Энэ субарга буряадуудай «Байкал» бүлгэмэй үүсхэлээр, «Фонд развития культуры и туризма на Камчатке» эмхиин болон нютаг можын бүхы ажаһуугшадай туһаар баригдаһан юм. Мүнөө жэл «Сурхарбаанай» үедэ тэдэ субаргын хажууда хүрдэнүүдые нэмэжэ тодхоо бшуу.
(Үргэлжэлэлынь 43-дахи дугаарта уншахада болохо).
Нордоп БАБУЕВА.
