Хахархай
асфальтын забһараар
Һая бултайһан ногоон
Хаан тэнгэриин бэлэгые
Һалаануудаа һарбайлган,
Дохёод лэ абана.
Үндэһэн хүрэтэрөө шииг шэнгээжэ,
Үндыхэл байха нютагайм ургаса!
Хүсэ шадалаа сүм элсүүлжэ,
Хурса годлидол нариихан
Хүндэ шулууе нэбтэ харбажа,
Хатуу дэбдимэл сүмэ соолоод,
Алтан наранда, мүнхэ тэнгэридэ
Аляархан заатагүй дүтэлхэл байха.
Зондоо адли заяанһаа шэрхи
Золтой нютагайм ногоон эрдэни!
Найдал
Хүлгөөн байдалай хүмэреэндэ
Хүндөөр этэрүүлжэ болохош.
Тогтохогүй сагай тооһондо
Толгойгоо төөрижэ болохош.
Харан гэхэдээ, нэгэтэ
Харанхы нүхэнэй оёорто
«Халаг», - гэжэ үрдингүй,
Хара бэеэрээ унахаш.
Гараха гэхэдэш газаашаа,
Ганса нариихан утаһан
Гарташ арайхан баригдаха,
Газаашань шамай гаргаха.
Энэ харанхышни – байдал,
Энэ утаһаншни – найдал.
Бэеышни һүнэһэнтэй залгагша,
Бэрхэтэй сагта абарагша.
