Урда-Ага нютагай захиргаанай, Агын аймагай, тойрогой, хизаарай засаг зургаануудай аша оролдолгоор түлэблэл бэелүүлэгдээ гээшэ. Һууринай толгойлогшо Зоригто Мункожаргалович нютагайнгаа мэргэжэлтэдтэй, нютагһаа гараһан зонтой зүбшэн хэлсэжэ, гүрэнэй программада орохо ябуулга хэжэ эхилһэн байна. Конкурсын шанга шалгалтануудые гаража, «Комплексное развитие сельских территорий» гэһэн гүрэнэй программада орожо шадаа. Энэ программын аша туһаар хүдөөдэ заһабарилгын хүдэлмэринүүд ябуулагдаа. Агын аймагай, тойрогой захиргаанууд барилгын тендер, аукцион соносхожо, подрядчигуудые олоо. Эртэ хабарһаа эхилжэ, орой намар болотор нютагай 11 объектдэ һэльбэн шэнэдхэлгын ажал хэгдээ. Сагай уларилай хүсэд дулаараадүй байхада, подрядна эмхинүүд барилга хэжэ захалаа. Барилгын нөөсэ хэрэгсэлнүүдые шэрэһэн унаанууд Урда-Агын гудамжануудаар эртэ хабарһаа орой намар болотор иишэ тиишээ һүндэлөө. «Теремок» хүүгэдэй сэсэрлиг, һургуулиин интернат, бэеэ элүүржүүлдэг тамирай талмай, тамирай комплекс, соёлой байшан г.м. объектнүүдтэ халуун ажал эхилээ һэн.
Хүүгэдэй сэсэрлиг шэнэлэгдээ
Хүүгэдэй сэсэрлигэй һэльбэн шэнэдхэлгэ «Новастрой» гэһэн эмхи ябуулаа. Барилгын эмхиин хүтэлбэрилэгшэ Дамбаев Белик Батоевич болоно. Байшанай һэльбэн шэнэдхэлгэдэ 64 сая гаран мүнгэн зөөри һомологдоо. Барилгашад апрелиин 1-һээ ажалаа ябуулжа эхилһэн байна. Cонхо, палааха, хушалта һэлгүүлээ, таһалганууд соохи хананууд шэрдэгдээ, дулаасуулгын түхеэрэлтэнүүд, зайн галай утаһанууд шэнэлэгдээ бшуу. Газаань хүүгэдэй наадаха, сэнгэхэ талмайнууд түхеэрэгдээ, оршон тойронхи газар болбосон түхэлтэй болгогдоо. Байшанай һэльбэн шэнэдхэлгэ ябуулһан эмхи ажалаа шанартайгаар ба болзор соонь дүүргэхые оролдоо.
«Манай эмхиин ажалшад даалгагдаһан ажалдаа хананхатайгаар хандажа, һайнаар барихые оролдоо. Ажалаа тогтоонгүй ябуулха гэхэдэмнай, барилгын хэрэгсэлнүүдэй сэн бодожо, мүнгэмнай түрүүшээр дуталдаа. Тиибэшье засаг зургаанай дэмжэлтээр барилга бүтээ һэн. Дулаасуулгын түхеэрэлтэнүүдые, санузел тодхолгодо ехэнхи сагнай ошоо. Түсэбэй ёһоор, объектээ сентябриин 30-да тушааха байгаабди. Теэд зарим дутуу дундануудаа усадхахыемнай манда үшөө саг үгтөө һэн. Ноябриин 30 болотор бүхы ажалаа одоол дүүргээд байгаабди», - гэжэ Белик Дамбаев тайлбарилаа.
Багашуулай гуламтые даагша Чимита Дашицыреновагай мэдүүлһээр, «Теремок» саадта 37 багашуул ябана. Багашуулай амарха, хүмүүжэхэ талада бүхы эрхэ нүхэсэл зохёогдонхой. Гэбэшье зарим эд бараа шэнэлхээр болонхой. Аятай зохид байдалда Урда-Агын эдир багашуулай гүйсэд хүмүүжэхэнь лабтай. Нютагай үхибүүдые багаhаань эрдэм шудалуулжа, түрэл хэлэндэнь һургаха, hургуулиин урда тээ бэлэдхүүлхэ гэhэн шухала зорилго «Теремок» саадай хүмүүжүүлэгшэд аша үрэтэйгөөр бэелүүлдэг гээшэ. Сэсэрлиг ороходо, үхибүүд түрэл хэлэн дээрээ харилсан наадажа байгаа бэлэй. Танигдаашьегүй бидэнэй орожо ерэхэдэ: «Мэндээ!», «Сайн байна!», - гэлдэхые дуулахада урматай даа. Багашуул энэ сэсэрлигтэ ябажа, hургуулиин урда тээ hайн бэлэдхэл гарана. Хүмүүжүүлэгшэд багашуулда хэшээл заахадаа, түрэл хэлээр гүнзэгы мэдэсэ олгуулхые оролдоно. Һуралсалай үедэ үргэн талмайтай сэсэрлигэй байшан соо 1,5-6 наһанай багашуул хүмүүжүүлэгдэнэ. Тэдэнэртэ буряад, ород хэлэнэй, тоо бодолгын, зурагай, дуу хүгжэмэй, хатарай хэшээлнүүд ябуулагдана. Дүй дүршэлтэй, шадамар бэрхэ багшанарай хүтэлбэри доро үхибүүд ганса үзэг бэшэгтэ һурана бэшэ, мүн алишье талаар хүмүүжэл гарана. «Теремок» сэсэрлигэй дэбисхэр дээрэ үхибүүдэй тамирай янзануудаар бэеэ һорихо талмайнууд түхеэрэгдэнхэй. Эндэ бүһэтэн, багашуулай гэртэхин турнигуудые тодхоо, түмэр түдэгэ гагналгын, модоор дархалалгын, цементээр шудхалгын хүдэлмэринүүдые ябуулһан байна.
(Үргэлжэлэлынь 4-дэхи дугаарта уншахада болоно).
Эрдэни ЧИМИТДОРЖИЕВ.

Комментарии
AVS что ль присутствовать сконструирован сверху различных платформах равно разных технологиях, таких как научно-образовательный онлайновый певчий экзархиатр (IVR, онлайновый голосовой эхо), текстуальный электрохимообработчик (NLP, обработка природного слога) а также боты.
wiki страница что такое
рейтинги сайтов сериалов 6f44dc4
p@11=777
RSS лента комментариев этой записи